Jun 14, 2011

انت يا بابا هنا

(1)

لما بابا كان هنا
مش كل الوقت كنت ببقى شايفاه اوقات كنت ببقى معاه واوقات كان يغيب او يسافر دلوقت هو عند ربنا بس معايا في كل مكان حساه بروحي اوي لكن عينيا بس هي اللى مبقتش شايفاه


---------------------

(2)

طفلة صغيرة من اطفال العيلة عندها يادوب 7 سنين بتحب بابايا اوي كانت قاعدة جنبي امبارح حضنتني وطبطبت عليا وقالتلي انتي زعلانة ليه قولتلها علشان مش هشوف بابا تاني ووحشني اوي

قالتلي : لا , غلط ... احنا كلنا هنشوفه تاني لما نموت


----------------------

(3)

الميراث الحقيقي
اصدقاء بابا الحقيقيين اوي اللي حزنهم على فراق بابا اكبر من اي كلام

ذكريات وسيرة طيبة تتقالي عن بابا من ناس اول مرة اقابلهم

صور بابا اللي قليلة بس كلها حياة

موبايله ونضارته ومفاتيحه وبطاقته واوراقه ...حاجات بسيطة بس غالية اوي علشان كانت دايما معاه ولمساه
--------------

(4)

في ناس لما بتموت .... بتموت
وناس حتى في موتها عايشة معانا الحياة


--------------

(5)


سارة اختى ثانوية عامة
النهاردة كان تاني يوم ليها في الامتحانات
سارة لابسة سلسلة فيها صورة بابا
وهي في الامتحان
وقفت معاها مسألة ... افتكرت بابا وبعدين قررت تحاول تاني في المسألة حاولت وحلت ولما خلص الامتحان وهي خارجة مسكت السلسلة اللي فيها صورة بابا وباستها
وهي خارجة من اللجنة المراقبة سألتها صورة مين دي اللي في السلسلة

قالتلها : صورة بابا
ردت المراقبة : يا سلام وتبوسيه ليه ماهو ابوكي في وشك ليل نهار ايه ده يعني ... ميصحش كدة يا بنت

سارة قالتلها : لا بابا مات من شهر
ردت المراقبة بعصبية : برضه مايصحش واصلا حرام الصور سواء في سلسلة ولا في البيت ...فاهمة؟


سارة رجعت البيت بتعيط من طريقة كلام المراقبة مش هقول ان الموقف يستدعي البكا ..هي سارة بس اللي حساسة اوي انما حقيقي انا معرفتش ارد على سارة لما سألتني هي ليه المراقبة زعقتلي كدة

اللي عارفاه انها اكيد كان ممكن تكلمها بطريقة ألطف من كدة



6 التعليقات:

Tarkieb said...

دي مراقبة معندهاش اي فكر عن التربية ...ولا تزعلي ياسارة لو منك تبوسي الصورة كل يوم قدامها وتغيظها...بابا سايب رجالة مش عيوطة

Tamer Moghazy said...

المراقبة دي (افراز) طبيعي لمجتمع فاقد للاحساس بالاخر ومعندهوش اي ثقافى تعامل مع الناس ولا تحاور بطريقة كويسة..
ما تزعليش يا سارة.. كفاية ان عندك اجمل بسكوتة في الدنيا :)

احساس طفلة محبة للرومانسية بس واقعية said...

قوليلها متبكيش بابا مكنش هيحبك تبكى من كلام واحدة متستهلش اصلا ولا عندها شوية مشاعر دا بدل ما تتعامل معها بهدوء طب مش عشان لانسانية عشان هى ثانوية عامة واعصابها مشدودة اصلا ربنا يسامحها
بس برضو يا سارة متبكيش يكفيكى انك حسيتى ان بابا معاكى ربنا يصبر قلوبكم ويجعل بابا من اهل الجنة

دمتى بكل خير

Ze2red said...

leah el morakba 3amlt keda, the least she could have done when ur sister told her about ur dad enha te7mar w teskot.

Ramy said...

على قد ما انبسطت من كلام البنت الصغيرة

على قد ما أتنرفزت من المراقبة اللى مش محترمة
دى أقل كلمة عليها



ربنا معاكى
يا بسكوته
و كل ما هتكونى اقوى دة هيأثر على أختك بالأيجاب

ربنا معها
و يفتح بصيرتها

Remas said...

بسكوتة حبيبة قلبي
انا مش عارفه اقولك ايه لانى حاسه اوى اوى بيكى
دائما الاشخاص اللى ربنا راضي عنهم سيرتهم عطرة اينما ذكروا
وباباكي رحمه الله ستظل سيرته عطرة
ويكفي انك واخوتك عمله الصالح في الدنيا فقد احسن ترببيتكم حقا

خلى بالك من نفسك اوى ومن سارة اوووووى وتانت اووووووووووى اووووووووى
وربنا يصبركم يارب