انت يا بابا هنا

(1)

لما بابا كان هنا مش كل الوقت كنت ببقى شايفاه اوقات كنت ببقى معاه واوقات كان يغيب او يسافر دلوقت هو عند ربنا بس معايا في كل مكان حساه بروحي اوي لكن عينيا بس هي اللى مبقتش شايفاه


---------------------

(2)

طفلة صغيرة من اطفال العيلة عندها يادوب 7 سنين بتحب بابايا اوي كانت قاعدة جنبي امبارح حضنتني وطبطبت عليا وقالتلي انتي زعلانة ليه قولتلها علشان مش هشوف بابا تاني ووحشني اوي

قالتلي : لا , غلط ... احنا كلنا هنشوفه تاني لما نموت


----------------------

(3)

الميراث الحقيقي
اصدقاء بابا الحقيقيين اوي اللي حزنهم على فراق بابا اكبر من اي كلام

ذكريات وسيرة طيبة تتقالي عن بابا من ناس اول مرة اقابلهم

صور بابا اللي قليلة بس كلها حياة

موبايله ونضارته ومفاتيحه وبطاقته واوراقه ...حاجات بسيطة بس غالية اوي علشان كانت دايما معاه ولمساه
--------------

(4)

في ناس لما بتموت .... بتموت
وناس حتى في موتها عايشة معانا الحياة


--------------

(5)

سارة اختى ثانوية عامة
النهاردة كان تاني يوم ليها في الامتحانات
سارة لابسة سلسلة فيها صورة بابا
وهي في الامتحان وقفت معاها مسألة ... افتكرت بابا وبعدين قررت تحاول تاني في المسألة حاولت وحلت ولما خلص الامتحان وهي خارجة مسكت السلسلة اللي فيها صورة بابا وباستها
وهي خارجة من اللجنة المراقبة سألتها صورة مين دي اللي في السلسلة

قالتلها : صورة بابا
ردت المراقبة : يا سلام وتبوسيه ليه ماهو ابوكي في وشك ليل نهار ايه ده يعني ... ميصحش كدة يا بنت

سارة قالتلها : لا بابا مات من شهر
ردت المراقبة بعصبية : برضه مايصحش واصلا حرام الصور سواء في سلسلة ولا في البيت ...فاهمة؟

سارة رجعت البيت بتعيط من طريقة كلام المراقبة مش هقول ان الموقف يستدعي البكا ..هي سارة بس اللي حساسة اوي انما حقيقي انا معرفتش ارد على سارة لما سألتني هي ليه المراقبة زعقتلي كدة

اللي عارفاه انها اكيد كان ممكن تكلمها بطريقة ألطف من كدة