Jun 27, 2011

ليه اتقتل؟؟؟؟؟؟؟

بابا ليه اتقتل
Z153938232_large

علشان شوية مجرمين خلوا السلاح في مصر كأنه بونبوني في متناول الجميع

علشان شوية مجرمين قرروا مايقوموش بواجبهم لما سابوا عربية زي دي متفيمة ومفيش عليها نمر تمشي في طرق مهمة زي دي من غير ما نقطة تفتيش واحدة او كمين واحد يفتشها ويشوف كمية السلاح اللي كانت معاهم

علشان في نظام فاسد قال عليكم بالاختيار اما الفوضى او الاستقرار ومن بعد التنحي بدقايق وسرقة الاراضي والنهب وضرب النار وارهاب الناس ابتدى
شفت بعيني حاجات كتير
وشفت بابا في التلاجة
وشفت من بعده ولسة بشوف ايام مرة اوي


انا ليه بقول الكلام ده دلوقت بعد 51 يوم من وفاة بابا
لان لحد النهاردة المجرمين لسة ماليين الطرق
والسلاح لسة بيدخل البلد
والاهالي كل يوم بتفقد اعز ماليها
والتلاجات كل يوم بتتملي ضحايا
وشهادات الوفاة كل يوم بيتكتب فيها
سبب الوفاة : طلق ناري
والموظفين لسة بمنتهى السخافة اول ما يلاقوا حد بيقدم شهادة وفاة فيها طلق ناري
يشهقوا الشهقة المعهودة ويسألوا نفس السؤال
اتقتل ليه وازاي ؟؟؟

بابا وغيره ممن قتلوا ظلما وعدوانا
ربنا رحيم بيهم
يرحمهم ويسكنهم جناته


انا وغيري من اللي فقدوا اعز ما ليهم
ربنا رحيم بينا
يرحمنا ويصبرنا وقادر يطبطب علينا


اما الظلمة المجرمين
اللي لسة عايشيين حياتهم
على دم اهالينا وعلى دموعنا

فربنا مش بيضيع حق المظلوم

حسبي الله ونعم الوكيل

اللي شاف الحلقة اللي ظهر فيها والد ووالدة الشهيد د\ أحمد أحمد السعيد الزقرد
اللي اتقتل من كم يوم على الطريق الدولي بنفس البشاعة
هيعرف ليه بكتب كدة

واللي سمعها وهي بتقول شفت ابني في التلاجة
واللي منكم عارف ان انا كمان شفت بابا في التلاجة في دمه
هيعرف ليه بكتب بدموعي الكلام ده


يارب عليك بالظلمة
عليك بالظلمة
عليك بالظلمة
اللي قتلوا بابا وغيره
واللي ساعدوا الناس يبقوا مجرمين
واللي دخلولهم السلاح
واللي ماقموش بواجبهم وسابوا الطرق من غير حماية
واللي قرروا ان الكلمة الاولى في مصر تبقى للفوضى

يارب
يارب
يارب

انت اعلم بحالي
صبر قلوبنا يارب وبرد نارنا

وبدعي لكل حد يارب ما تشوفوا شر

واسفة على البوست الحزين والبوستات الشبيهة
بس انا ابويا اتقتل بالرصاص وانا اتدبحت بسكينة غيابه


17 التعليقات:

~ISLAM~ said...

الله يرحمه ويصبركم
ويصبر كل اهالى الشهداء
الايمان بالله مهم اوى فى اللحظات دى
صلى وادعى واقرى قرآن وخليكى قريبه من ربنا دايما
دى اهم حاجه عشان تفرحى والدك فى قبره
وعشان قلبك يرتاح من الصدمه الصعبه
حسك جدا ومقدر كل اللى انتى فيه
وبتمنى من ربنا انه يلهمك الصبر
اما القتله صدقينى لو اتعاقبوا دلوقتى
هيكون اهون ليهم بكتير من عقاب ربنا
وسواء اتعاقبوا دلوقتى او متعاقبوش
ربنا مبيضيعش حق حد ابدا
لأنه اكبر من اى ظالم
حسبنا الله ونعم الوكيل

Ramy said...

متتأسفيش يا بسكوته

طب لما مش هنسمعك و انتى مجروحة

يبقى احنا ملناش لازمة

ربنا يرحم بابا

و ان شاء الله فى الجنة

أما بالنسبة للناس دى و اللى لسه قاعدين كدة
السافلة دول

ربنا يمهل و لا يهمل

ربنا مابينساش حق مظلوم مهما طال الوقت


ربنا معاكى
و يصبرك

Layla said...

الله يرحمه .. وانشاء الله دمه مش هيروح هدر
البقاء لله

فاتيما said...

بتتأسفى على ايه يا بسكى ؟!!!

ذنب عمو ف رقبتنا
زيه زى كل اللى راحوا ف الثورة دى
ودمهم مبردش ولا هيبرد
الا لما اللى قتل يتحاسب
واللى حرض ع القتل يتحاسب
واللى اهمل متعمداً عشان الفوضى تحصل يتحاسب

يا كدا
يا كلنا نروح نموت احسن

اروع ما ف الثورة دى
ان العام اختلط بالخاص
و حالة اى واحد
بقت حالة الكل
وعمو الله يرحمه ..ذنبه ف رقبتنا
وان شاء الله حقه يرجعلكم
ويبرد ناركم ..لما تشوفوا اللى عملها
ف مكانه اللى يستحقه
ويكفى عقاب ربنا ... لكن القصاص العادل حق و حقيقة

اكتبى
انا مصرة انك تكتبى وتكتبى وتكتبى
عشان عمو رمز لشهدا كتير راحوا ومش لازم حكايتهم تنتهى وتطمس معالمها
لازم الكل يعرف ويفهم ويربط الاحداث ببعض ويعمل حاجة ....

انا نازلة يوم 8 يوليو عشان كل الشهدا
عشان خالد سعيد و بنونة وبسيونى وسالى و قطب وسيد بلال والشهيد المبتسم ...
وكمان عشان عمو وكل اللى زيه

كان نفسى احضنك دلوقتى
بس مش عارفة
:(

عمرو فكرى said...

البقاء لله وحده

محتسب شهيد ان شاء الله

Tamer Moghazy said...

عندك حق في كل اللي قولتيه واكتر ..
بجد قلبي موجوع عشانك يا حسناء..
ربنا يرحمه ويصبركم

Sarah .. said...

باباكى .. ربنا يرحمه برحمته الواسعة ويسكنه فسيح جناته يارب
وزى ما انتى قولتى ان ربنا مش بيرضى بالظلم
حق باباكى واى شهيد هيرجع لما ربنا يريد بأمره حتى لو مش فى الدنيا
اللى عند ربنا مش بيضيع ابدا يا بسكوتة :)
ربنا يصبرك ويثبتك يارب
ويطبطب على قلبك
اكتبى ومتعتذريش على حاجة
احنا كلنا جنبك هنا وبندعيلك
..

Tarkieb said...

ربنا يرحمه ويصبركم ويريح روحه بعد م الناس دي تتحاسب وتتحاكم

مونتي بوكيه ورد said...

بسكوته الاول حمد الله علي سلامتك
فاكر اخر مره دخلت عندك كان يوم وفاة الرجل العظيم والد هذه الفتتاه التي احترم كتابتها وارائها و شخصيتها
ربنا يرحمه ويكتب له خير في جنة الخلد ه ووابي وكل المسلمين اللهم امين
اللهم اوسع قبره وانره هو وابي وكل المسلمين و ارحمهم و اسعدهم و اجعلنا الابن الصالح الذي يدعوا له فيستجاب منه برحمتك وكرمك يا الله
يااااااااااااااااااااااااااارب
تعرفي .. في قصة حصلت مشابهه لموقف السياره المتفيمه ال ماشيه بسلاح بلا رقيب القصة اعرفها بالتفصيل .. سياره متفيمه وعليها ارقام وبكل بجاحه تدهس شاب طبيب في مقتبل العمر كل ذنبه انه حب :)) اه والله حب بنوته .. ممكن تكون الحمايه خياليه وشبه الافلام بس هي الدنيا كدا عباره عن فيلم قصير بيتعاد تفاصيله و سيناريو الحوار بطريقة مختلفه .. بس لازم نضحك عشان الصورة تطلع حلوه و لازم نصرخ عشان الصرخة تدوي و يعرفوا ان لينا صوت ولا زم نثور و نقف قدام الظلم ولازم نحب عشان يبقي عندنا مشاعر ولازم نبكي عشان احنا بنحس
ولازم نقول يارب لان هو لوحده ال قادر يجيب لنا حقنا
يااااااااااااارب

شمس النهار said...

اسكن الله فسيح جناته ورحمه رحمة واسعة واسكنه عليين
الموقف اكبر من اي كلام

فاتيما said...

صباح الخير يا حبيبتى

مونتي بوكيه ورد said...

ما أجمل الصباح عندما يبدأ بصباحات أجمل الناس
شمس النهار بسطوعها و فاتيما بنقاوة روحها

و ابتسامة امل من مونتي لكل من نحب
فصباحك خير و شكرا علي اهتمامك و سعة صدرك
و كلنا اخوات و مش هنسيب بعض ابدا و كان نفسي يبقي في بلوجر زي الفيس كدا لما نرد علي بعض يجيبلنا
Notifications
لكن حتي دا مش هسمنعنا نطمن علي بعض

صباحكم سكر
:))

Unknown said...

بجد أنا مش لاقيه كلام أعلق بيه ربنا يصبرك و يقويكي و يجازي كل متسبب في كده باباكي شهيد و في الجنة و نعيمها ان شاء الله دفع حياته تمن قلة الضمير و فساد 30 سنه خلى مصر طافيه على بركة من البلطجيه و المجرمين.
خليكي قويه ربنا موجود

Ehab said...

ربنا يرحمه ويكتبله اجر الشهيد
ويرزقكم انتي واسرتك الصبر
البقاء لله
متحسبيش الدنيا دي فيها عدل الدنيا دي وقت قصير هيعدي انا عايزك تحطي في دماغك ان في يوم قيامه هيجي هيجي مفيش نقاش وكل من ظلم هيتحاسب
وحساب ربنا مش هين
وعذاب النار الأبدي مش ممكن يوصف
الناس دي مش عارفين او مش متخيلين يعني ايه عقاب ربنا
احتسبي مصيبتك عند ربنا
وصدقيني هو اقوى منتقم

تقبلي مروري

مونتي بوكيه ورد said...

ممكن اكون بتأخر شوية بس مبنساش اطمن علي كل هديده غاليه في حياتي يارب تكونوا بخير و رمضان كريم

Tears said...

لسه عارفه الكلام ده لانى بقالى فترة مش بدخل على المدونات او بدخل بسرعه اوى...كنت فاكراها وفاة طبيعية

واضح ان شر مبارك مش ح ينتهى و ح يفضل يحصد وماعدتش فاهمه نعمل ايه تانى عشان نعدل البلد دى

ربنا يصبرك و يرحمه يارب

مش متخيلة يعنى ايه عربيات بتقتل الناس عشوائيا و ح يستفيدوا ايه و لية و ازاى بيمروا بسلاح

بس مش لازم تخلى الاحزان تنسيكي انك لازم تاخدى حقة...دى مسئولية وزارة الداخلية..ألجيىء للمحامى امير سالم او جمال عيد همه بيعملوا تطوعا

ربنا كبير

Anonymous said...

Hello! I just wanted to take the time to make a comment and say I have really enjoyed reading your blog.