Apr 18, 2012

لفوق

Photo link:


حبيبي بابا

انت وحشتني اوي

انا بكلمك كتير بقالي تقريبا سنة بقولك حاجات كتير وببعتلك سلامات مع ربنا

ياترى يا بابا انت سامعنى

كنت سامعني

ولسة بتسمعني

بتوصلك سلاماتي

واكتر كلمة ببعتهالك

انك وحشتني اوي

ياترى يابابا هناك في دنيا تانية غير دنيتنا انت لسة فاكرني

لسة فاكر ان انا بحبك اوي

طيب لما ببعتلك سلامي ودعواتي

انت عارف انها مني

طيب ياترى لما باجي ازورك انت فعلا بتكون حاسس بيا

عارف يعني ان انا اللي جايالك ازورك لانك وحشتني

انت لسة فاكرني يعني

في دنيتنا دي ولحد ماانا اسيبها انت هتفضل بابايا حبيبي

هل وانت هناك في دنيا تانية فاكر برضه ان انا بنتك

ولا الدنيا التانية مش بتخليكوا تفكروا في الناس اللي في دنيتنا

بابا انت عارف

انا بحتاجلك اوي

وكل مااحتاجلك بلاقي نفسي ضعيفة

بس برجع ابقى قوية علشان مصدقة انك يمكن تكون باصص عليا من فوق فوق كل الحاجات وهتكون عاوزني قوية وهتزعل مني لو لقيتني ضعيفة

زمان لما كنت ببص للسما

كنت بقول ياترى مين شايفنا من فوق ربنا بس ولا الملايكة والناس اللي سابوا دنيتا

دلوقت كل ما ابص لفوق اقول ياترى بابا بيبص عليا هو كمان

شايفني

وممكن اكون دلوقت ببص لفوق في لحظة هو كمان بيبص عليا فعيني تيجي في عنيه حتى لو مش شايفاه

هو هيعرف من عنيا اد ايه واحشني

عارف غلطان اوي اللي قال ان الوقت بينسي الجروح

وانا كل ما يعدي الوقت جرحي يزيد لانك بتوحشني اكتر

طيب مش هتصدق لما اقولك ان اوقات بفكر افكار عبيطة واقول طيب لو بس يرجع شوية واحضنه ويمشي تاني

اوقات بحب اتعامل كانك مسافر ويمكن يمكن ترجع في يوم

صوتك واحشني

كلام كنت بتقولهولي وحشني

ياترى كلامي ده هيوصلك

هتقراه ولا هتحس بيه

ولا ربنا هيوصلهولك

اكتر حاجة عاوزاك تعرفها ان انا بحبك لآخر الزمان.

اشوفك على خير يابابا

لك مني اغلى سلام

بنتك

13 التعليقات:

Miss LoZa said...

عمو زمانه شايفك
وحاسس بيكى
وبيقرا كل كلمة وكل حرف بتكتبيه
بيسمع كل حاجة بتقوليهاله
بيرد عليكى كمان صدقينى
انا شايفاه بيبتسم اهو وبيقولك وحشتى بابا يا بسكوتة بابا :)

لما بنحب حد أوى يا بسكوتة بيفضل جنبنا
مهما كان بعيد
الحب مش انى اشوفك واكلمك وابصلك
لا اصلا
الحب انك تفضلى جوايا
تفضلى فى قلبى
تفضلى فى كيانى
اتعامل معاكى اونتى بعيد كانك موجودة

الحب الى بجد يا بسكوتة هو الى بيزيد مع الوقت
بيزيد مع كل ثانية بتعدى علينا فى البعد

الحب هو ان مع زيادة البعد وطوله .. تعلقنا بالشخص وتمسكنا بيه واصرارنا على اننا هنشوفه تانى وهنبقى معاه تانى بيزيد

كل ما تيجى عليكى لحظة تلاقيكى زعلانة أو تلاقى عمو واحشك .. أفتحى صورته وكلميه ومن غير ما تعيطى
كل كلمة هترن فى ودانك هتبقى دى رد عمو عليكى
هتلاقيه بيقولك
I believe in you

ساعتها هتتولد جواكى طاقة أكبر من أى حاجة .. طاقة تخليكى قادرة تكملى

فى جنات الخلد بأذن الله

:)

أنا بحبك <3

Sarah .. said...

:) :)

نيللي علي said...

أتوجعت!

أكيد حاسس بيكي كل مابتدعيله وأقري قرآن كتير وأهديلو ثوابه

ويارب يصبر قلبك يارب

الازهرى said...

أو ولد صالح يدعوا له


ادعائك بيوصل له أكيد
وبإذن الله تجتمعى معاهفى الفردوس بعد عمر طويييييييييييل

ربنا معاكى

طبعا البنات يمتنعون

Baskouta said...

LOzty
Nelly
Sarah
الازهري

شكرا ليكم انكم بتشاركوني الوقت ده
ميرسي لكلامكم اوي
ربنا يسعد اوقاتكم

Baskouta said...

زهراء حبيبتي
كومنتك وصلني
واحتفظت بيه
لاني حسيته غالي اوي
مش مجرد كلام
ده كلام شايل جواه جزء غالي من حياتك

عاوزة اقولك ان كومنتك انتي خلاني اعيط

وكأنه حضن في عز الضعف

ربنا يسعد اوقاتك
ويرحم امواتنا جميعا

Tarkieb said...

ربنا عادل واكيد له حكمه في كدة بس احنا عندنا قصر نظر ومش بنشوف الصورة كاملة...اضحك عليكي لو قلتلك اني ما تأثرتش من كلامك وماحسيتش بكلامك وما زعلتش عشانك اوووي بس الحقيقة هي إن الارواح بتحس من غير كلام....اكيد هو دلوقتي ملاكك الحارس وجايز ربنا عمل كدة عشان يقدر يدافع عنك اكتر من لو كان موجود...عارفة؟ مجرد انك تفكري في الكلام اللي عايزة تقوليه له وهو ح يحس بكل فكرة بتدور في دماغك ربنا معاكي ويصبرك ..

لــــ زهــــــراء ــــولا said...

بسكوته


اسفه والله انى خليتك عيطتى مش كان قصدى خالص مالص بس عن جد كنت ولازلت اشعر بكل حرف من حروفك الرائعه واشعر بالشجن والحنين اليه رحمة الله عليه ولانى اشترك معاكى فى هذا الحنين كتبت كلماتى البسيطه
يارب يفرح قلبك ويسعد ايامك يارب
تقبلى كل تقديرى ودعوات بالسعاده

زهراء

Zika said...

:)
بقالي كتير ماقرتش حاجه حلوه عن الموضوع ده
يومك جميل

Anonymous said...

أحسبه يرتع في نعيم الجنه

Humman being said...

عارفة ان شهر مايو شهر صعب عليكى لأنك فقدتى أعز الناس فيه ... عارفة كمان ان كل الأيام بقت تقيلة وصعبة وطويلة وملهاش طعم أوى
بس اللى عارفاه أكتر ان الراجل المحترم أوى ده ساب بنت جدعة ب 100 راجل هتعرف تقف وتقاوم
أصعب حاجة ان تمر الدنيا من غير ما يكون فيها علامة كبييييييييييرة جدا نفضل فاكرينها وواقفين عندها
بس انتى والحمد لله ربنا اداكى أكبر علامة وأحسن وأدفا حضن وقلب وحب أب هيفضل معاكى وجواكى العمر كله
مش ممكن يكون واحشك كل ده وانتى مش وحشاه أو يكون مش سامعك صدقينى والله سامعك وحاسس بيكى لأبعد درجة

ربنا يفرح قلبك دايما ويعوض صبرك خير

لــــ زهــــــراء ــــولا said...

بسكوته
انا قولت اسال واطمن عليكى عشان مختفيه يارب تكونى بخير وسعاده

زهراء

Tarkieb said...

جاي اقول رمضان كريم وكل سنة وانت طيبة