Oct 11, 2011

مش موجود

باقي 5 ايام
على

جلسة في محكمة
وقاضي

ومجني عليه

مش موجود

مجرد اسم على ورق


اصله مات


وجناة

مش موجودين

مجرد اسامي على ورق


اصلهم هربانين


و حكم

شوية كلام على ورق

مش هيتنفذ

يعني

مش موجود

اصله هيتنفذ على مين؟؟؟؟


************

انا زعلانة اوي يا ربنا

انا مش مستنية اللي هيقوله القاضي

ومش عاوزة اسمعه
ولا هسأل

هو القاضي كان شاف ايه علشان يقول حاجة تبرد قلبي
شاف بابا في دمه
شاف الرصاص الكتير اوي
شاف دموعنا
شاف حالنا من بعده
شاف حسرة قلبي
شاف كسرة ماما اللي بتموت من حزنها على حبيب عمرها

هو ما شافش حاجة

ده حتى ما شافش اللي قتلوه

انا كمان ولا عاوزة اشوف ولا أسمع


وهعتبر ان كل ده مش موجود

------------------------------------
الى بابا : انا بنسى انت سيبتني ازاي علشان فاكرة بس انك سيبتني
الى ماما : انا قدام حزنك ده بحس باكبر عجز في حياتي
الى فيفيان : انا بدعيلك وانا بصلي
الى كل حد فقد حد : انا بدعي بقلب عارف يعني ايه معنى الفقد
الى منونة : انتي وحشتيني
الى عادل : اجمل ما في كلامك انه كلامك
الى رامي : ربنا هيطبطب على وجعنا كلنا
الى فاتيما : انتي عارفة من غير ما اقول
الى د .ستيتة : انا وحشتني الطبطبة اللى في كلام حضرتك
الى انا : انا كويسة
الى ربنا : يارب ماليش غيرك
الى مصر : ربنا أكبر من كل حاجة كبيرة وحشة واقفة في طريقك .. ربنا اكبر

9 التعليقات:

فاتيما said...

بس ربنا موجود
ودا اهم من كل شى
يا حبيبتى

و ثقى ان
لما مصر تاخد حقها
كل مظلوم فيها
هياخد حقه
هوه كمان



لا تعوّلى كثيراً
على دلوقتى
لأن العدل بييجى
بأمر ربنا وحده
مش بتوقيت البنى آدمين


هما عليهم يسعوا
وياخدوا بالاسباب

يحاولوا
وقد ينجحوا
او يفشلوا

بس المهم
يعملوا اللى يقدروا عليه


وأظم انكم فى حدود
كل الممكن والمعقول
والأهم .... الآمن
عملتوا اللى عليكو
وجيتوا على نفسكم بزيادة

خلاص

سيبى الباقى على ربنا
ومتعذبيش نفسك
متصورة ان مفيش فايدة
ولا امل

القصاص آت
ربنا اسمه العدل يا بسكى

ربنا اسمه العدل


جميلة رسايلك قوى
ومؤلمة
بس كويس انك كتبتيها
وخرجتى اللى جواكى

انا مبسوطة بحالة النشاط التدوينى دى
وشيفاها أحسن حاجة بتحصلك حاليا

يا ريت تستمرى
عشان تفضفضى
وتخرجى كل اللى جواكى
وتكتبى ذكرياتك
وتوثقى احزانك
عشان ف يوم ترجعيلها
وتفتكرى الفرق ..لما ربنا يبعت نصره
وتحسى ان فعلا الدنيا اتغيرت
انا بعمل كدا
بفر ف تدويناتى القديمة
واكتشف ان الحال اتغير للاحسن
كتييير والحمدلله

وان شاء الله
طبطباتك جاية


خلى بالك من نفسك

Tarkieb said...

الى بسكوتة . ربنا موجود

adel said...

عدل رينا مش بيستني حكم محكمة ومش بياخد حضور وغيبا

Miss LoZa said...

حلوة اوى
وبتوجع اوى يا بسكوتى :(
ربنا يرحم عمو
ويصبركم ان شاء الله :)

Nouna said...

ربنا يربت علي قلبك يا حبيبتي
وإن شاء الله ستنقلب المحنة إلي منحة في القريب العاجل وستثبت لك الحياة أن من فُقد له أب قد يحزن كثيرا .. لكن من له رب فإنه لا يحزن أبدا ..

أحسنِ الظن بالله .. واذكريه كثيرا .. وثقِ في رحمته

بابعت لك طاقة إيجابية

وباحضنك حضن كبير

мαησηα said...

تو ماى سويت بسكوتة ... اى لوووف يو سو ماتش

♥♥♥♥♥

Shaimaa said...

أنا معرفش يا حبيبتى انك فقدتى والدك كدة أنا آسفة والبقاء لله وربنا معاكى يصبر قلوبكم كلكم ويجيب حقكم

Baskouta said...

يارب يا شيماء
ربنا يسمع منك

ربنا يخليكي ليا حبيبتي

Baskouta said...

ونعم بالله ربنا موجود

شكرا على كل كلامكم
:)