Mar 31, 2010

هو انا ممكن اكتب بالعربي ؟؟؟؟؟؟؟؟؟

حالة الحب

هي: انا متغيرة

صديقتها : بتحبيه؟؟

هي : اه

صديقتها : بيحبك؟؟

هي : امممممم

صديقتها : مبسوطة

هي : اه

صديقتها : ازاي؟

هي : ازاي ايه ؟؟

صديقتها : اوصفيلي الحب ده

هي:اممممممم هي حالة

عارفة الحالة دي

انك تحسي ان قلبك ده بيدق علشان حد

انك تصحي من النوم عارفة ان نفسك تبقي احلى واحدة وارق واجمل واحدة علشان حبيبك

انك تقعدي تفكري في الحاجات والكلمات اللى لما تقوليها هتسعد قلب حبيبك

انك لما تقفي قدام المراية وانتي لابسة حاجة حلوة عليكي تتمنى انك تشوفي نفسك في عيون حبيبك في اللحظة دي

انك لما تنامي وتاخدي احلامك في حضنك تلاقي انها كلها بتدور في دايرة واحدة وهي انك نفسك تبقي مع حبيبك

انك وانتي ماشية في الشارع او بتشتغلي او مع اصحابك قلبك وعقلك وروحك موجودين في اتجاه تاني

هم مع حبيبك

انك لما تشوفي مشهد رومانسي تتخيلي نفسك مع حبيبك في نفس المشهد

انك لما تسمعي اغنية عجباكي تحسي ان الكلام ده لو هيتقال لحد يبقا لحبيبك

انك لما تقري كلام حلو في الحب تتمني انك لو هتسمعي الكلام ده يبقا من حبيبك

ان برفانك مايبقاش احلى الا وانتي حطاه وانتي رايحة تقابليه

وان مكياجك يبقا الاجمل بس علشان هتشوفيه

ان قلبك يتعلم الرقص بس على نغمات صوته

انك لما تبقي مضايقة متحتاجيش الا حضن حبيبك

انك لما تبقي فرحانة تبقى الفرحة مقسومة على قلبين قلبك وقلب حبيبك

ان حبيبك يظهر في كل امنية في كل حلم في كل تخيل في كل دقة قلب

ان احلى اسم بتقوليه يبق اسمه

ان اجمل صوت يبقا صوته

ان ادفا مكان يبقا حضنه

ان كل الامان يبقا لمسة من ايده

ان اجمل ما في الكون تكون نظرة حب في عيونه

وان ارق ما في الحياة يكون كلمة بحبك منه

انك تبقي عارفة انه هنا معاكي حتى لو بعيد

ان فرحته تبقا فرحتك

وألمه يبقا هو المك

وانك تعيشي تفاصيل حياته حتى لو مش معاه

وهمه يبقا هو كل همك

وفرحه هو كل املك

انك تحبي وتتحبي

انك تبقي اجمل لانك بتحبي

انك تبقي انقى واصفى لانك حبيبته

انك تحبي نفسك معاه

وتعشقي تفاصيل علاقتكوا حتى لو متعبة

ان كلامه يبقا هو كل الكلام

وعنيه تبقا اجمل مراية

ولهفته عليكي تبقا كل مناكي

ومصالحته بعد الزعل تبقا ألذ تعب

وانك تبقي اقوى واحدة وقت ضعفه رغم ضعفك

انك تستحملي اللى مكنتيش تتخيليه بس علشان تقفي جنبه

انك تشجعي وتطبطبي وتدلعي وكانه ابنك

انك تبقي عاوزة دايما تبقي معاه الاولى في كل حاجة

اول صباح يبقا منك

اول مساندة في وقت التعب تبقا منك

اول كلمة تشجيع منك

اول مشاركة في فرحة تبقا منك

انك تحسي انك عايشة بس علشانه

وان كل هدفك انك تخليه مبسوط

ان حياتك مش بتكمل الا بوجوده

وان روحك دايما حواليه

عارفة الحالة دي

كلامي ممكن يكون ملخبط ومش منطقي في كل الحالات

بس هي دي الدنيا حالة حب

فيها ما فيها

بس هي حالة

حالة يمنحها لك الحبيب دون قصد

وهي اجمل حالة

حالة حب

عيـــــــشـــييييييها

حبي الحالة

وعيشيييييييييها بكل ما فيها

ازعلي واتصالحي

حبي واحلمي

افرحي واتعبي

اشتاقي و ابعدي

قربي وطبطبي

دلعي واستمتعي

اغضبي واعذري

حبي

يعني

عيشي

بس

عيشي صح

19 التعليقات:

adel said...

للاسف انا مقرر معلقش عند حد الفترة دي
لظروف خارجة عن الارادة بس بلف صدفة لقيت البوست ده

ردي بس بتفهم صح

تصفيق ... حاد .... جدا

محمد فؤاد (صاحب عمود النور) said...

الله
انتى قولتى كل الكلام اللى بيحسه الحبيب مع حبيبه
بجد بجد كلامك دخل جوايا ..انا كنت عارف كل كلمة هتكتبيها بس بجد صدقينى كان عند لهفة انى اقرى واقرى
احستنى يا بسكوته وكلامك كلام من القلب

Anonymous said...

جاااااااااامد اووووووووووووى

هو ده الحب بس اللى بيحب بجد

Tears said...

ازيك يا بسكوته

مبسوطة انك بدأتى تعبرى بالعربي كمان

لطيف اللى كاتباه بس اعتقد انه بيوصف مشاعر اقرب للهفة او الاشتياق او الاحتياج اللى بيكون موجود فى سن مبكرة من الشباب اللى لسه بيستطلع الحياة و بيجرب كل حاجة لاول مرة اكتر من فكرة الحب الناضج

تحياتي لكى

SHAPE YOUR LIFE (ABOALI) said...

ادم خلق وكان يمر فى الجنة يرى الجميل من الاشياء ولكنه لم يكن باسما ولم يكن فرحا ولم يكن ايضا حزينا فلخلق منه له الله حواء
فلما راءها ادم احث بشوق واستئناس لها فنادهاان تاءتى ولكنها اشارت اليه ان ياءتى هو فكان اللقاء و وحدث الالتقاء وذابت الفوراق وشعر كل منهما بحاجته واحتياجه الى حب وعطف وحنان وسكن الاخر


هذا ما ترجمه كلامك


تحياتى على بوست استمتعت بقراءة معانيه

VOltaa said...

رهيبة جدا جدا جدا جدا

sony2000 said...

الله الله الله
بجد بوست رائع واحساسه الاروع
تقبلي مروري وتحياتي

فاتيما said...

ممكن ؟!!

ليه مش ممكن
منتى كتبتى أهو

انتى عارفة رأيى مسبقاً

انه تحفة و كان لازم يتحط ف بوست لوحده
و الكل يقراه

و يا ريت تكررى المحاولة

انتى بتكتبى حلو
لأنك بتفكرى حلو
و بتعرفى تنقى العبارات و الألفاظ المناسبة
بحكم شغلك
و كمان بحكم انك ذواقة للكلمة
و بتعملى كدا بالإنجليزى
و قريب بالأسبانى

يبقى مش هينفع بالعربى ؟؟
ازاى


مش هتكلم عن مضمون البوست
لأنه فعلا ادق وصف للحب

بحبك يا عيون مامى
و منحرمشى من كتاباتك
عربى و لا انجليزى و لا اسبانى و لا حتى بلغة اهل المريخ

Baskouta said...

Adel
---------
صاحب عمود النور
---------------
Star


ميرسي على تشجيعكم ومتابعتكم
واحساسكم
تحياتي البسكوتية

Baskouta said...

Tears
ازيك يا حبيبتي
انتي وحشتيني
وميرسي على الكومنت
بس انا عاوزة اسألك هو الحب والمشاعر المرتبطة بيه
له سن
له وقت
مش عارفة؟؟؟
طيب يعني هو لو واحدة طريقتها في الحب كدة ...بتعيشه كدة
لو حبت وهي في العشرينات هيبق حبها مختلف عن لو حبت في سن تاني

انا مستنية ردك عليا
تحياتي البسكوتية

Baskouta said...

Shape your life
انا مبسوطة اوي ان حضرتك استمتعت بقراية البوست
وان معانيه قدرت توصل لحضرتك بالشكل اللى كتبته في الكومنت
ميرسي اوي لحضرتك على المتابعة وعلى الزيارة
تحياتي البسكوتية

Baskouta said...

Sony
ميرسي على الكومنت المشجع
وعلى الزيارة
تحياتي البسكوتية

Baskouta said...

مامي
ميرسي يا مامى انك شايفاني بفكر حلو وبكتب حلو
انا مش حاسة بكدة
بس يكفي ان الاحساس يوصل
اوقات بيبقا فيه احساس ومش بنبقا لاقيين الكلام اللى يرسمه ويوصفه بجد
واوقات تانية الكلام بيطلع لوحده

بحبك يا مامي
بنتك بسكوتك

Anonymous said...

حلوه اوي

اخيرا نطقتي بالعربي

شويه كدا وهنعلمك الردح على اصوله

بس بجد حلو اوي كلامك

يا بخته

مش هجيب سيرة خيانة الجمعه اللي فاتت ربنا أمر بالستر

بس بدي زنب من تحت لتحت وصاصا ودودو طلعوا طيبين

وجاري البحث عن واحده توريكوا

Ana keda said...

حلو اوى يا بسكوتة
بجد بوست عسول واحساسه عالى اوى
فرفشى كده يا حبيبتى وربنا يخليكى احسن واحدة فى الدنيا :)

reem said...

بسكوتى الحلوة الامور

يعنى لما دى اول مره بالعربي وبالجمال دا طيب اللى بعد كدا هايبئا ايه

ايه يا بنتى الاحساس الحلو دا
انتى وصفتى بجد احساسيس الحب بطريقة تجنن

وانا شايفه ان الاحساس دا مش مرتبط بسن معين خالص وانه لو حب بجد هايفضل بنفس الاحساس دا مهما تغير السن

بجد يا توتة حلو اوى اوى واستمرى في الكتابة بالعربي مع الانجليش

بتوحشينى جداااااااااااا
ويارب ابعد عننا عيون الناس الوحشين اللى زعلانين وبيحسدونا واول حرف من اسمهم مصري جدا

عاشقه الرومانسيه said...

على راى بابا هانى اخيرا نطقتى عربى؟
هههههههه
ماانتى جامده اخر ثلاث اربع حاجات اهو
يابنتى اكتبى عربى والله اسلوبك جمييييييل جداااا
وكلماتك مُعبره قووووى
تسلم ايدك
وان شاء الله مش اخر بوست عربى
((:

Timo.. said...

((الحب هو الود والحنيه...
عمره ماكان غيرة وظنون واسيه...
الحب هو اللي بأمره هويتك...
وامره ده لا بإديك...ولا بإديه...))

=================== ثومة ====

الحب هو هو انك ما تقوليش كلمه <>..
لأنك خجلانه..
لأنك مرتبكه...
لأنك حاسه برهبه...
لأنها اول مرة...
لأنك ...
((فعلا)).. بتحبيه...!!

Anonymous said...

as usual you are amazing

Whether you write in English , Spanish or Arabic

it is not about the language

its about the heart

and yours are kind & sweet

so you always able to hit the spot

i hope you are okay

may all the happiness of the world surrounds you

your old friend

M.