Jan 5, 2012

فضفضاتي



خليهم حلوين زي ماهم

في ناس بنحبهم اوي لدرجة اننا لما بيكونوا لاي سبب مش موجودينن ممش بنتحمل حاجة تتقال عليهم عاوزين دايما سيرتهم حلوة حتى لو الناس دي جرحتنا مش بنقدر او بمعنى ادق مش بنرضى نصدق عنهم اي حاجة وحشة من وجهة نظري دي نعمة كبيرة اوي اننا نكون عندنا الاحساس ده ناحية اللي بنحبهم اننا نكون دايما عاوزين نشوفهم حلوين
هو احنا لو ماحافظناش على شكل اللي بنحبهم هنحافظ على شكل مين
---------------------------------------------
وانت مالك

كتير اوي ممكن تتقالنا الكلمة دي وننجرح اوي منها لاننا بنكون مهتمين بالشخص التاني بجد وبيجرحنا اوي
انه مايكونش مقدر
من وجهة نظري الشخصية ابسط رد على السؤال ده واللي افضل من انك تقدم مبررات اهتمام
او انك تزعل من اللي قالهالك او انك حتى تقرر ان كفاية
أبسط رد هو انك تقرب من الشخص ده وتحضنه وتقوله انا بحبك
---------------------------------
كويس اننا عارفين اننا بنغلط

ان فعلا كلنا بنغلط محدش فينا معصوم بس كمان لما بنغلط ونرجع عن الغلط
بننسى حاجة مهمة اوي بننسى نشكر ربنا على نعمة ادراك الخطأ
نعمة كبيرة اوي من ربنا اننا نحس اننا بنغلط لان في ناس في الدنيا عايشين وبيغلطوا
لكن للاسف مش شايفين انهم غلط ولا حاسين ان في شيء صح ناقص
-------------------------------
لالا ده شخص مش كويس مش هقدر اتعامل معاه

طيب فكرت مرة قبل ما تحكم على الشخص المش كويس وقبل ما تتكلم عنه وقبل ما تلومه
في كل جلسات الاصدقاء

هل فكرت تشكر ربنا انه عافاك من الخطأ بتاع الشخص ده

هل فكرت مرة تقول الحمدلله الذي عافانا
هل فكرت تقول يارب اكفيني شر الخطأ ده
على فكرة الخطأ زي المرض ممكن يصيب اي حد فياريت متفرحش اوي في مصاب شخص اخر
وتقول عليه ببساطة ده شخص مش كويس او دي انسانة مش كويسة
ا
لافضل ليك وليه
انك تدعيله ربنا ينور بصيرته ويهديه للي فيه خير
وانك تدعي لنفسك ان ربنا يعافيك
واخيرا تشكر ربنا انه حفظك من انك تكون في نفس الخطأ.
------------------------------------
صفحات نفسي امحيها

اوقات كتير بنقول ياريت في ايدي الغي فترة معينة من حياتي او تصرف معين عملته
ناس كتير بتحس بكدة بس هل في مرة فكرنا ان لولا الايام دي مكناش هنكون هنا مكناش هنبقى احنا في الحال اللي احنا فيه الصفحات اللي قبل كدة بكل ما فيها بتعبها ولخبطتها هي اللي وصلتنا للصفحة اللي احنا فيها دلوقت
-----------------------------------
اعمل ايه بالأسف

ناس كتير بترد الرد ده لما حد يعتذرلها وبتحس ان خلاص الاسف مش هيفيد ولا هيصلح الموقف ولا هيرجع اللي راح وبنقول الكلمة دي وكأننا بنحدف طوبة في وش اللي جاي يعتذر
بس حد فينا حط نفسه مكان اللي بيعتذر ممكن يكون مش قادريعمل اكتر من الاسف او مش عارف ايه ممكن يتعمل او حاسس بغلطته لدرجة ان شايف ان اي محاولات منه مش هتداوي اللي عمله
الشخص اللي بيعتذر موجوع زيك
وزي ما هو شاف انك تستحق انه يعتذر
هو كمان يستحق انك تتقبل أسفه علشان نعرف نعيش

--------------------------------
انا حاسس بيك

بسيطة اوي الكلمة دي بس قوية اوي اوقات بنشوف حد بنحبه تعبان اوي وبيمر بوقت صعب
ولما بنكون عاجزين عن المساعدة بنلاقي اننا ممش لاقيين غير احساسنا
ماتستهونش باحساسك بالاخرين ساعات بيكون هو ده كل الممطلوب
------------------------------
ماتوجعنيش شكرا
ياريت يكون في الخدمة دي
خدمة تخلي الانسان يقدر يقول ماتوجعنيش
مش هقولك علشان انا طيب او موجعتكش او مش بقصد اضايقك
لالا انا هطلب منك ماتوجعنيش علشان انا موجوع كفاية
موجوع ومش عاوز اتوجع اكتر

بس كدة
معنديش اسباب لطلبي ف ياريت ماتوجعنيش شكرا
----------------------
انت ليه نسيت

ليه نسيت الاوقات الحلوة والذكريات الجميلة والضحكة اللي رنت في قلوبنا واللمسة الحنينة
والنظرة الطيبة
واللهفة الدافية والقلق عليك
ليه نسيت
هو انا لازم اموت علشان تضطر تفتكرلي الحلو
من منطلق اذكروا محاسن موتاكم
طيب لو ده اللي هيفكرك بالحلو مني
اعتبرني مت
----------------------
بــحنلك

اوقات الكلمة دي بتكون أقوى من كل كلام الحب

اصلك بتحن في اللحظة دي لحاجات انت حبيتها بجد مع الشخص ده
بتحن لنفسك معاه بتحن لحالتك وياه
علشان كدة انت لما بتحنن لحد فانت في الحقيقة بتحنلك
بتحن لنفسك وعلشان كدة لو حد قالك بحنلك
صدقه اوي
--------------------------
أسرارنا
مش اسرار كونية ولا هتلاقي فيها سر القنبلة الذرية
أسرارنا
سرية
علشان هي بتاعتنا
عارف يعني ايه بتاعتنا
يعني اتولدت بالظبط في الحتة النونو اللي بتكون
موجودة بينا وانت ماسك ايدي
خليها دايما مدفية في حضن الحتة دي
----------------------------
ماتقولش

ماتقولش مش زعلان لو انت فعلا زعلان
عرفني علشان أصالحك
علشان ماتزعلش أكتر لو انا مفهمتش انك زعلان بس ما بتقولش
------------------------------------
زي ما انت
ايوة زي ما انت
مش عاوزاك تتغير ولا عاوزاك حد تاني
علشان ببساطة لو مش عاوزاك انت زي ما انت وعاوزاك شبه حد
كان الاسهل احب الحد التاني

زي ما انت أحلى
-----------------------------
انا بحبني وانا هنا

وهنا دي ممكن تكون الحتة الدافية اللي بتكون بين حبيبين بيتكلموا
او الحتة الرايقة بين صديقين بيفضفضوا

او الحتة الصافية بين واحد وكتاب بيقراه
او الحتة البعيدة اللى بنقعد فيها مع احلامنا
او الحتة اللي بين ضحكة وضحكة بنضحكها واحنا مع حد بنرتاحله
كلنا عندنا الحتة اللي بنحبنا فيها
وهتلاقي نفسك بتقول انا بحبني في الوقت ده
بحبني وانا رايقة مع كتابي او وانا بضحك مع صحبتي او وانا ببتسم في حضن حبيبي

------------------------------
بسكوتة

29 التعليقات:

Ramy said...

((:

حمد الله على السلامة

........

((:

طب نقول دة بوست تعليمى مشاعرى

صادق

جميل قوى جدا خالص البوست


برافو ليكِ

Baskouta said...

الله يسلمك يا رامي
ميرسي على كلامك
مبسوطة ان البوست عجبك
بس هو ولا تعليمي ولا حاجة دي مجرد فضفضات بسكوتية
نورتني
:)
يارب تكون في أحسن حال

Tarkieb said...

حمد الله ع السلامة ....ياه خايف اقول لما بتغيبي بتففضي حلو ههههه فا غيبي وفضفضي....طب ايه رايك كل يوم . حتة صغيرة كده ع الماشي ....على فكرة حلو اووووي لما بتففضي عربي

فاتيما said...

حمدلله ع السلاااااااامة
يا بسكوتة قلبى

بصى

انا عاوزة أعلق على كل حتة ف التدوينة
ممكن ؟؟

طيييييييب


------------------------------

خليهم حلوين زى ما هما

قصدك قصاد نفسنا ؟
ولا قصاد غيرنا ؟؟

أصل انا لو حد سقط من قلبى
هيسقط كمان من نظرى
ومش هيهمنى قوى أحافظ على منظره

لكن لو له سقطات او عيوب
وانكشفت قصادى ولسه معزته ف قلبى
مرحتش ..
مش هيهمنى حتى اتعامل مع العيوب دى
او اجملها قصاد غيرى

يهمنى نفسى معاه
انا حباه كدا
وبس

مش فارق منظره عند غيرى

يعنى بابا الله يرحمه
كان عصبى وبيتخانق مع طوب الأرض
ومشاغب مع ناس كتير
وحاجات كدا ...
بس انا بحبه رغم هذا
ولما حد ف العيلة يفكر بس يقول ربع كلمة عن طباعه او كان بيعمل معرفش ايه او كدا
بطلع فيه اكله ...

جايز مش عارفة اشرح قوى
بس الملخص
ان منظره قصادى أهم شىء
ومش مهم الناس

فاتيما said...

وانتا مالك
----------


النهاردة اتقالتلى
و ضحكت لصاحبتها ببلاهة ...


كنت ف المترو وست قاعدة قصادى
فجأة طلعت بنت المترو ومعاها شنطة وكتب دراسة
اول ما وقفت جنبى راحت حاطة الكتب على حجر الست اللى قاعدة دى
فنا افتكرتها تعرفها
بصيت لوش الست لقيتها مذهولة شوية
بعدين بصت للبنت وسكتت
بعد شوية البت مش تسكت بقى
لأ
راحت حاطة الشنطة فوق الكتب على حجر الست
وطلعت الموبايل بتاعها وقعدت تكتب على تويتر
طبعا انا واقفة جنبها ومراقبة الموقف كله ...

الست سكتت ومتكلمتش
وانا استفزيت جداااااااا
ايه دا ؟
وبعدين قولت اسكتى يا فاطمةى ملكيش دعوة
لحد ما الست قامت عشان تنزل المحطة بتاعتها
راحت مدية البنت الشنطة والكتب وقالتلها تعالى مطرحى
البنت خدت الحاجة وراحت قاعدة من غير ما تفتح بوقها بكلمة ...
انا بقى مطقتش
روحت سأله الست وهى بتنزل
هوه حضرتك تعرفى الأستاذة دى ؟!!
وروحت مشوارة ع البت ام موبايل
اللى انتبهت فجأة وسمعتنى ...
واللى حوالينا كمان
فالست ردت عليا .. لأ معرفهماش
روحت قايلالها ..طب انا كمان معرفش حضرتك ولا اعرفها بس البنيابة عنها بقولك شكرا على ذوقك ...

بصتلى بإمتنان وقالتلى العفو وراحت نازلة

البت بقى
بصتلى شزرا
وقالتلى السؤال دا
انتى مالك ؟

رحت بصالها ببلاهة وتانحة
وخدت بعضى ونزلت على محطتى
وسبتها منظرها زبالة قصاد كل اللى قاعدين ...

بس كدا

فاتيما said...

كويس اننا عارفين اننا بنغلط


للأسف يا بسكى
بقيت دلوقتى حاسة
والكلام عليا قبل غيرى على فكرة

بقيت حاسة ان الواحد بيعترف انه غلط
عشان محدش يطلب منه يصحح الخطأ دا او يغير من نفسه او ميكرروش تانى ...


للأسف

فاتيما said...

ده شخص مش كويس ...


طب ماذا لو تعدى مرحلة عدم الكواسة ودخل ف منطقة المرض النفسى ؟!!!

ماذا لو دخل ف دائرة الاذى الفعلى ؟!!

نعمل ايه ساعتها ؟
ماهو لازم نبعد للأسف

فاتيما said...

صفحات نفسى امحيها


تصدقينى لو قولتلك
مش عاوزة امسح حاجة حتى الوحش

اصل الوحش خلانى حلوة ف حاجات
واختفائه ممكن يكون سبب ف اختفائها هيا كمان


المكتوب لازم يتشاف
واحدى علامات النضج
ان الواحد يقبل المر زى ما بيرحب بالحلو


بس يبقى فيه حلوووووو
يمشى بالتوازى او التوالى حتى مع المر !!!!

فاتيما said...

اعمل ايه بالأسف ؟

كنت بقولها ليوسف
..
مش مهم الأسف
المهم الغلطة اللى ادت للأسف
متتكررش


انا احد عيوبى حكاية الإعتذار دى
فيه خطروفة كتبتها مرة وللأسف هيا بتجسدنى بالحرف ...
الأعتذار البارد اهانة تانية
وانا لما حد بيتأخر ف الإحساس انه زعلنى او مبيحسش اصلا انه زعلنى ...
بتبقى مشكلة جامدة

مبعرفش أتعافى وارجع بسرعة
لأنى ف الغالب برضو مبزعلش بسرعة

حاجة ليها علاقة ببرج التور
زعلهم بطىء ..
بس لما بيحصل بيبقى مقرف


هحاول اصلح دا قدر الممكن
ان شاء الله

فاتيما said...

انا حاسس بيك


انتى قولتى جملة عبقرية
الاحساس بالآخرين ساعات بيكون هو ده كل المطلوب فعلااااااا

فاتيما said...

متوجعنيش شكرا


يا ريت

فاتيما said...

انتا ليه نسيت

الفقرة دى بعتبرها اسرية عائلية
عادة أقرب الناس من افراد العيلة الواحدة من كتر ما بيبقوا ف وش بعض بيركزوا ع البواخات وبينسوا الحاجات الحلوة ويروحوا يدورا عليها مع الغرب ..

فاتيما said...

بحنلك دى انتى يا بسكوتة
دى كلمة بتختصرك

انتى الشخص دا
اللى بيتعجن بحب اللى قصاده
ويتوحد معاه اوقات كتير
ويحس بيه ع البعد
ويخلص بلا مقابل

انتى بحنلك دى جدااااا

فاتيما said...

اسرارنا

موافقة جدا
بس كام حد بيقدر دا ؟

فاتيما said...

متقولش

كنت زمان مبقولش انا مش زعلانة

دلوقتى بقيت اقول
ولا بيهمنى

بس بقيت ازعل الناس منى
او عليا
للأسف

فاتيما said...

زى ما انتا

الجزء دا تحففففففففففة
عاوز يتحط ف بوست لوحده

يا بخته سى كوكيز لما يشرف العالم البسكوتى

دا هيتحب حب !!!!
يا لهوى

فاتيما said...

انا بحبنى وانا هنا

انا بحبنى وانا مع حد بحبه وبيحبنى

بحبنى وانا ف مدونتى

بحبنى وانا ف التحرير

بحبنى ف حاجات كتير

فاتيما said...

عمومااااااا

انتى عوضتينا الغياب

ببوست متين
مش عايزة اقول كرريها تانى
لتستحلى البعاد

بس كررى التدوينات
اللى كد
وغير كدا

زى ما انت



خليكى زى ماانت أحلى

Baskouta said...

Tarkieb:
:)
الله يسلمك
ميرسي جدا ليك
وميرسي أكتر علشان انت دايما بتسأل عليا
وبجد دي حاجة غالية جدا عليا

اما عن الغياب
والفضفضة
انا بعد ما كتبت حسيت ان اي حد هيقرا هيقولي
ماتفضفضيش تاني

بس اوك حاضر
حاجة صغيرة كل شوية

ميرسي تاااااالت على تشجيعك لفضفضتي العربي
:)

Baskouta said...

فاتيما
او مامي فاتيما

اولا الله يسلمك
ثانيا : انتي طبعا تعلقي على كل تفصيلة براحتك
المدونة وصاحبتها تحت امرك

اما عن التعليقات الجميلة اللي استمتعت بقرايتها اوي
ممكن ارد عليها واحدة واحدة وبالترتيب ؟
أوك نبتدي
-------------

خليهم حلوين

اه موافقاكي ان لو حد سقط من القلب
خلاص مش هنقدر نحافظ على شكله
لكن اوقات بحس
ان الاحسن نفضل شايفينه كويس علشان مانزعلش عليه او منه أكتر
واللي فعلا كنت اقصده
منظره قدامي
يمكن مش عرفت اوضح اوي بس اقصد نفسي تفضل الصورة جميلة
اما عن الباباهات
فدول خط أحمر
ربنا يرحم باباكي وبابايا
-----------

وانت مالك

موقفك عجبني جدا
وحسيت برقي عالي اوي
واد ايه انتي اتصرفتي بشياكة مبقتش مموجودة
وشابووووو كبير على التصرف ده

--------------

كويس اننا عارفين اننا بنغلط

اتمنى ربنا يديم نعمة ادراك الخطأ علينا
علشان نقدر ندرك اننا غلط
ونصلح ونعتذر
والفكرة مش الاعتراف بالغلط لشخص اد ما هي اننا نعترف اننا غلط قدام نفسنا
ونحاول دايما نصلح الغلط

----------------

ده شخص مش كويس

انا وجهة نظري

عدم كواسته
مهما كانت درجتها
تستدعي جدا
اننا ندعيله ربنا يساعده يكون احسن
ونقول برضه الحمد لله الذي عافانا
ونشكر ربنا اننا موقعناش في نفس الغلط

والناس المؤذية
ندعي ربنا يكفينا شرهم
-----------------
صفحات نفسي امحيها

انا اعترف ان اوقات اتمنيت امحي اوقات وايام
لكن الايام دي عندي احساس
ان لولا كل الاوقات
مكنتش هكون هنا
وزي ما انا
مش شرط اكون في احسن حالاتي
لكن كل اللي فات هو اللي عملني دلوقت

----------------

أعمل ايه بالاسف

بتوجع الكلمة دي

وعن زعلك
فأه عارفاه
:)
بس
في العام
اتمنى ماقولش الكلمة دي ولا تتقالي
لانها بتوجع
--------------------

انا حاسس بيك

:)

والله طول عمري بعتبر الاحساس بالاخرين نعمة غالية اوي اوي
بشكر ربنا عليها

--------------------

متوجعنيش شكرا

ايوة
ايوة جدا
ياريت
ماتتوجعنيش شكرا

-------------------

انت ليه نسيت

حساها اوسع من مجرد عائلية

اي ناس كانوا في يوم سوا
ليه لما يبعدوا
بينسوا
بلاش ننسى الحلو لبعض
بقولهالي وبقولها للكل
مش لازم اموت علشان تفتكرلي الحلو
-----------------

بــحنلك
بحن
الكلمة دي بحبها اوي وبحسها اوي
وبقدرها اوي
الحنين لاوقات
او لاشخاص
بيكون في المقام الاول حنين لنفسنا
بحنلي وانا مبسوطة معاكي
بحنلك

------------------
أسرارنا

غالية اوي اوي علشان
هي اسرارنا
ال نا الاخيرة دي
غالية اوي
واوقات بيكون كل اللي حيلتنا
هي الحاجات اللي بتنتهي بال نا الاخيرة دي
اسرارنا - اوقاتنا - احلامنا - افراحنا

------------------

متقولش

لازم نقول
لازم بجد نقول
ونقول بسرعة علشان نتصالح بسرعة
ومنضيعش وقت في الزعل
بقولهالي وبقولها للكل

--------------------

زي ما انتا

الجزء ده
هو قلب الحدوتة
انا بحبك انتي زي ماانتي
مش انتي مع بعض التعديلات

زي ماانتي أحلى


-----------------------

انا بحبني

وانا بحبني وانا بتفرج على فيلم رومانسي
بحبني وانا باكل شوكولا
بحبني وانا لابسة هدوم مريحة
بحبني وانا بحلم بايام حلوة
بحبني وانا بتصور
بحبني وانا مع حبايبي

-----------------

اقولك ايه بقى
ميرسي اوي على الكومنتات الحلوة
حساها احتفالات بالبوست مش مجرد كومنتات

وانتي دايما الأحلى

بنوتك
:)

P A S H A said...

حلوة نظرة التسامح اللي بتطل من بين سطورك
:)
دمتي بخير وسعادة
خالص تحياتي وعميق احترامي وتقديري

Baskouta said...

Pasha
روح التسامح
هي اللي بتخلينا
نعرف نعيش

ميرسي لحضرتك على الكومنت والامنيات الحلوة
ونورتني
تحياتي
:)

فاتيما said...

صباح البسكوووووووت

انتى غطسانة فين ؟

faroukfahmy58 said...

يابسكوته انا مصدقت لقيتك
انت كنت فين
وبعدين ليه لا تظهر اعمالك فى لوحة تحكمى
انا قشلت ان اجد مربع متابعينك للاشتراك وكل ما اطلبه شاكرا ان تنضمى على الاقل لمتابعينى لارى اعمالك
كم انا فى شديد الرغبة لمتابعتها
الفاروق

Baskouta said...

فاتيما
مساكي خير يا مامتي
انا أهو
غطست وطلعت اخد شوية اكسجين واغطس تاني
ههههههههه

لالا
بهزر
انا اهو
ماتحرمش من السؤال

Baskouta said...

الفاروق

مساء الخير على حضرتك
انا يشرفني جدا ان حضرتك تتابع البوستات بتاعتي
وتعليق حضرتك اسعدني جدا

حاضر انا هتابع مدونة حضرتك

ميرسي جدا لحضرتك
تحياتي

Shaimaa said...

Baskouta
اذيك وحشتينى ... بتكتبى بالعربى جميل أوى زى الانجليزى
فيه حاجات بتوجع فى البوست ده ... نفسى الناس تبقى متسامحة أوى بنفس الدرجة اللى انتى كاتبة بيها دى ... عارفة يت بسكوتة أنا عايشة حالة من "التقوقع" على نفسى بسبب معظم الحالات اللى انتى كاتباها دى بقيت أخاف أقرب من البشر لحسن أسمع وأشوف حاجة تجرح وأنا خلاص معدتش عندى مجال لحاجة

دمتى بخير

Baskouta said...

حبيبتي شيماء
وحشتيني كتير
حقيقي وحشاني

ميرسي يا جميلة على رأيك في اللي بكتبه بالعربي
انتي دايما تشجعيني

انا قادرة افهم الحالة دي من التقوقع
ان خلاص مبقاش في فتفوتة في القلب متحملة اي حاجة وحشة او بتوجع

ربنا يا حبيبتي يطبطب علينا كلنا

والتسامح نعمة كبيرة
تستاهل نشكر ربنا عليها وندعي انها تفضل معانا دايما

كل وقت وانتي أحلى شيمو

VOltaa said...

ميس يو يا بساكيتوز
حمدلله بسة .. ايه اخبارك :)

لو ليكى اكونت عالفيس ابقى ضيفينى انا سايب اكونتى عالمدونة .. عشان نشوفوكى و كده .. انتى عارفانى بدخل بلوجر كل سنة مرة و المدونة عليها عونكبوت :D

نهارك ابيض زى قلبك يا جميل
:)