فضفضاتي

خليهم حلوين زي ماهم

في ناس بنحبهم اوي لدرجة اننا لما بيكونوا لاي سبب مش موجودينن ممش بنتحمل حاجة تتقال عليهم عاوزين دايما سيرتهم حلوة حتى لو الناس دي جرحتنا مش بنقدر او بمعنى ادق مش بنرضى نصدق عنهم اي حاجة وحشة من وجهة نظري دي نعمة كبيرة اوي اننا نكون عندنا الاحساس ده ناحية اللي بنحبهم اننا نكون دايما عاوزين نشوفهم حلوين
هو احنا لو ماحافظناش على شكل اللي بنحبهم هنحافظ على شكل مين
---------------------------------------------
وانت مالك

كتير اوي ممكن تتقالنا الكلمة دي وننجرح اوي منها لاننا بنكون مهتمين بالشخص التاني بجد وبيجرحنا اوي
انه مايكونش مقدر
من وجهة نظري الشخصية ابسط رد على السؤال ده واللي افضل من انك تقدم مبررات اهتمام
او انك تزعل من اللي قالهالك او انك حتى تقرر ان كفاية
أبسط رد هو انك تقرب من الشخص ده وتحضنه وتقوله انا بحبك
---------------------------------
كويس اننا عارفين اننا بنغلط

ان فعلا كلنا بنغلط محدش فينا معصوم بس كمان لما بنغلط ونرجع عن الغلط
بننسى حاجة مهمة اوي بننسى نشكر ربنا على نعمة ادراك الخطأ
نعمة كبيرة اوي من ربنا اننا نحس اننا بنغلط لان في ناس في الدنيا عايشين وبيغلطوا
لكن للاسف مش شايفين انهم غلط ولا حاسين ان في شيء صح ناقص
-------------------------------
لالا ده شخص مش كويس مش هقدر اتعامل معاه

طيب فكرت مرة قبل ما تحكم على الشخص المش كويس وقبل ما تتكلم عنه وقبل ما تلومه
في كل جلسات الاصدقاء
هل فكرت تشكر ربنا انه عافاك من الخطأ بتاع الشخص ده
هل فكرت مرة تقول الحمدلله الذي عافانا هل فكرت تقول يارب اكفيني شر الخطأ ده
على فكرة الخطأ زي المرض ممكن يصيب اي حد فياريت متفرحش اوي في مصاب شخص اخر
وتقول عليه ببساطة ده شخص مش كويس او دي انسانة مش كويسة ا
لافضل ليك وليه انك تدعيله ربنا ينور بصيرته ويهديه للي فيه خير
وانك تدعي لنفسك ان ربنا يعافيك
واخيرا تشكر ربنا انه حفظك من انك تكون في نفس الخطأ.
------------------------------------
صفحات نفسي امحيها

اوقات كتير بنقول ياريت في ايدي الغي فترة معينة من حياتي او تصرف معين عملته
ناس كتير بتحس بكدة بس هل في مرة فكرنا ان لولا الايام دي مكناش هنكون هنا مكناش هنبقى احنا في الحال اللي احنا فيه الصفحات اللي قبل كدة بكل ما فيها بتعبها ولخبطتها هي اللي وصلتنا للصفحة اللي احنا فيها دلوقت
-----------------------------------
اعمل ايه بالأسف

ناس كتير بترد الرد ده لما حد يعتذرلها وبتحس ان خلاص الاسف مش هيفيد ولا هيصلح الموقف ولا هيرجع اللي راح وبنقول الكلمة دي وكأننا بنحدف طوبة في وش اللي جاي يعتذر
بس حد فينا حط نفسه مكان اللي بيعتذر ممكن يكون مش قادريعمل اكتر من الاسف او مش عارف ايه ممكن يتعمل او حاسس بغلطته لدرجة ان شايف ان اي محاولات منه مش هتداوي اللي عمله
الشخص اللي بيعتذر موجوع زيك
وزي ما هو شاف انك تستحق انه يعتذر
هو كمان يستحق انك تتقبل أسفه علشان نعرف نعيش

--------------------------------
انا حاسس بيك

بسيطة اوي الكلمة دي بس قوية اوي اوقات بنشوف حد بنحبه تعبان اوي وبيمر بوقت صعب
ولما بنكون عاجزين عن المساعدة بنلاقي اننا ممش لاقيين غير احساسنا
ماتستهونش باحساسك بالاخرين ساعات بيكون هو ده كل الممطلوب
------------------------------
ماتوجعنيش شكرا
ياريت يكون في الخدمة دي
خدمة تخلي الانسان يقدر يقول ماتوجعنيش
مش هقولك علشان انا طيب او موجعتكش او مش بقصد اضايقك
لالا انا هطلب منك ماتوجعنيش علشان انا موجوع كفاية
موجوع ومش عاوز اتوجع اكتر
بس كدة
معنديش اسباب لطلبي ف ياريت ماتوجعنيش شكرا
----------------------
انت ليه نسيت

ليه نسيت الاوقات الحلوة والذكريات الجميلة والضحكة اللي رنت في قلوبنا واللمسة الحنينة
والنظرة الطيبة واللهفة الدافية والقلق عليك
ليه نسيت
هو انا لازم اموت علشان تضطر تفتكرلي الحلو
من منطلق اذكروا محاسن موتاكم
طيب لو ده اللي هيفكرك بالحلو مني
اعتبرني مت
----------------------
بــحنلك

اوقات الكلمة دي بتكون أقوى من كل كلام الحب
اصلك بتحن في اللحظة دي لحاجات انت حبيتها بجد مع الشخص ده
بتحن لنفسك معاه بتحن لحالتك وياه
علشان كدة انت لما بتحنن لحد فانت في الحقيقة بتحنلك
بتحن لنفسك وعلشان كدة لو حد قالك بحنلك
صدقه اوي
--------------------------
أسرارنا
مش اسرار كونية ولا هتلاقي فيها سر القنبلة الذرية
أسرارنا
سرية
علشان هي بتاعتنا
عارف يعني ايه بتاعتنا
يعني اتولدت بالظبط في الحتة النونو اللي بتكون
موجودة بينا وانت ماسك ايدي
خليها دايما مدفية في حضن الحتة دي
----------------------------
ماتقولش

ماتقولش مش زعلان لو انت فعلا زعلان
عرفني علشان أصالحك علشان ماتزعلش أكتر لو انا مفهمتش انك زعلان بس ما بتقولش
------------------------------------
زي ما انت
ايوة زي ما انت
مش عاوزاك تتغير ولا عاوزاك حد تاني
علشان ببساطة لو مش عاوزاك انت زي ما انت وعاوزاك شبه حد
كان الاسهل احب الحد التاني

زي ما انت أحلى
-----------------------------
انا بحبني وانا هنا

وهنا دي ممكن تكون الحتة الدافية اللي بتكون بين حبيبين بيتكلموا
او الحتة الرايقة بين صديقين بيفضفضوا
او الحتة الصافية بين واحد وكتاب بيقراه
او الحتة البعيدة اللى بنقعد فيها مع احلامنا
او الحتة اللي بين ضحكة وضحكة بنضحكها واحنا مع حد بنرتاحله
كلنا عندنا الحتة اللي بنحبنا فيها
وهتلاقي نفسك بتقول انا بحبني في الوقت ده
بحبني وانا رايقة مع كتابي او وانا بضحك مع صحبتي او وانا ببتسم في حضن حبيبي

------------------------------
بسكوتة

تاني وتاني

زعلانة

لا مش بعرف ازعل منك

طيب بتعيطي ليه

علشان انت زعقتلي اوي وانا مش عملت حاجة
تبقي زعلانة

لا مش زعلانة

طيب صالحيني

انا اللي اصالحك

اه

ليه؟

علشان انا زعلت اوي لما حسيت انك ممكن تكوني زعلانة
لا مش زعلانة

طيب مش عاوزاني اصالحك

لا صالحني

يعني انتي زعلانة ؟

لا مش زعلانة

يبتسم وياخدها في حضنه
ويطبطب عليها وبقولها

بحبك اوي ومش عاوزك ابدا تبقى زعلانة

يطبطب عليها ويروح مكتبه تاني

تعدي دقايق وفجأة يلاقيها داخلة عليه وتقوله

ممكن تزعقلي تاني بس بالراحة

ايه.. عاوزاني ازعقلك تاني ؟

اه اه عاوزاك تزعقلي تاني علشان عاوزاك تصالحني تاني وتاني وتاني

معرفتش أكشر

أنا زعلانة منك كتير اوي
بس بحبك أكتر
حلمت بيكي
وفي الحلم كنت عاوزة اكشر اوي
بس لاقيتني ببتسملك
وعلشان كدة انا دلوقت زعلانة منك أكتر
علشان خليتيني أحبك حب أكبر من اي حاجة
لدرجة انه خلاني مش عارفة أكشر في وشك ولو في الحلم
مع انك وجعتيني
بس
انا كنت عاوزة اقولك
انك وحشتيني

A broken promise.

When you break a promise you take.

You turn the feeling behind to be fake.

You break the person with whom the promise is due.

You break the image the other person had in mind about you.

We promised not to tell the stories we made together.

And to keep them safe in our hearts all the way till forever.

But you broke the promise and you ruined the trust.

And thus you lost me , our friendship suffering the thrust.

مش موجود

باقي 5 ايام
على

جلسة في محكمة
وقاضي

ومجني عليه

مش موجود

مجرد اسم على ورق


اصله مات


وجناة

مش موجودين

مجرد اسامي على ورق


اصلهم هربانين


و حكم

شوية كلام على ورق

مش هيتنفذ

يعني

مش موجود

اصله هيتنفذ على مين؟؟؟؟


************

انا زعلانة اوي يا ربنا

انا مش مستنية اللي هيقوله القاضي

ومش عاوزة اسمعه
ولا هسأل

هو القاضي كان شاف ايه علشان يقول حاجة تبرد قلبي
شاف بابا في دمه
شاف الرصاص الكتير اوي
شاف دموعنا
شاف حالنا من بعده
شاف حسرة قلبي
شاف كسرة ماما اللي بتموت من حزنها على حبيب عمرها

هو ما شافش حاجة

ده حتى ما شافش اللي قتلوه

انا كمان ولا عاوزة اشوف ولا أسمع


وهعتبر ان كل ده مش موجود

------------------------------------
الى بابا : انا بنسى انت سيبتني ازاي علشان فاكرة بس انك سيبتني
الى ماما : انا قدام حزنك ده بحس باكبر عجز في حياتي
الى فيفيان : انا بدعيلك وانا بصلي
الى كل حد فقد حد : انا بدعي بقلب عارف يعني ايه معنى الفقد
الى منونة : انتي وحشتيني
الى عادل : اجمل ما في كلامك انه كلامك
الى رامي : ربنا هيطبطب على وجعنا كلنا
الى فاتيما : انتي عارفة من غير ما اقول
الى د .ستيتة : انا وحشتني الطبطبة اللى في كلام حضرتك
الى انا : انا كويسة
الى ربنا : يارب ماليش غيرك
الى مصر : ربنا أكبر من كل حاجة كبيرة وحشة واقفة في طريقك .. ربنا اكبر